तलब भत्ताबाट राहत वितरण गर्दै वडाअध्यक्ष

ओखलढुंगा ८, फागुन । सिद्धिचरण नगरपालिका वडा नं. ११ का वडा अध्यक्ष बिनोद ताम्रकारले आफुले पाउने तलब सुविधा बापतको रकमले वडाबासीलाई  राहत वितरण गर्नुभएको छ । वडाअध्यक्षले  पाउने सुविधा बापतको रकम नलिने घोषणा गरेका ताम्रकारले वडाबासीलाई राहत वितरण गर्नुभएको हो । वडाभित्रका आर्थीक रुपमा विपन्न, अशक्त, बृद्धबृद्धा र भिन्न क्षमता भएकाहरुको वडाबाटै पहिचान गरि उनिहरुलाई गत दशैँमा खाद्यन्न र अहिले जाडो मौसममा ज्याकेट वितरण  गरिएको हो । गत दशैँमा ३० केजी चामल, २ केजी दाल, १ लिटर तेल र १ पोका नुनका दरले ३२ जना वडाबासीलाई खाद्यन्न वितरण गरेका थिए । अहिले जाडो मौसममा न्यानोकपडा स्वरुप ज्याकेट वितरण गरिरहनु भएको हो ।  ३२ जनालाई ज्याकेट वितरण गरिसकिएको र बाँकीलाई बितरण गरिरहेको ११ नं. वडा कार्यालयले जनाएको छ । छुट्टा छुट्टै समयमा ज्याकेट र खाद्यन्न पाएका नागरिकहरु खुशी हुँदै वडाअध्यक्षलाई धन्यबाद दिएका छन् ।  आफ्नो कार्यकाल भरी आफुले पाउने सुविधा बापतको रकमले वडाभरिका विपन्न नागरिकलाई आवश्यक्तानुसारको राहत बितरण गर्दै जाने वडाअध्यक्ष बिनोद ताम्रकारले बताउनुभयो । उहाँले भन्नुभयो;  ‘म निस्वार्थ सेवा गर्न जनप्रतिनिधी भएको हुँ, मेरो ५ वर्षको कार्यकाल भरी मैले पाउने तलब भत्ता बापतको रकम विपन्न नागरिकको सहयोगमा खर्च गर्छु ।’ पहिलो पटक गत दशैँमा    खाद्यन्न वितरण गरिएको र दोश्रो पटक चिसोको समय भएकाले ज्याकेट वितरण गरिरहेको बताएका छन् । हिडडुल गर्न सक्नेलाई वडाकार्यालयमा बोलाएर वितरण गर्ने गरेको र हिडडुल गर्न नसक्नेलाई घरमै गएर दिने गरेको बताएका छन् । अहिले ज्याकेट वितरण कार्य भईरहेको छ,  ३२ जनालाई ज्याकेट दिईसकिएको र १० वटा भन्दा बढी ज्याकेट दिन बाँकी नै भएकोले वितरण गरिरहेको अध्यक्षले बताउनु भयो । जाडो समय पुसमै वितरण गर्नेगरि ज्याकेट अर्डर गएिको भएपनि काठमाण्डौ बाट माघको अन्तिममा मात्रै ज्याकेट बनाएर पठाईदिएकाले ज्याकेट वितरण गर्न केहि ढिला भएको बताएका छन् । अब विद्यार्थीलाई विद्यालय पोशाक दिने सोच भएकाले बालमन्दिरका विद्यार्थी र युवावर्ष आधारभूत तह वितलवका विद्यार्थीहरुलाई विद्यालय पोशाक वितरण गर्ने तयारी रहेको वडाअध्यक्षको भनाई छ ।