पुस १७ । विभत्स हत्या गरिएका
ओखलढुंगा जिल्ला चिशंखुगढी गाउँपालिका–६, भदौरेका मगर दम्पतिको एउटै चित्तामा
दाहसंस्कार गरिएको छ । जिल्ला अस्पताल रुम्जाटारमा शवपरिक्षण पश्चात विहिबार
स्थानीय घाटमा दम्पतिको एउटै चित्तामा दाहसंस्कार गरिएको हो ।
किरानापसल सन्चालन गर्दै आएका ६० वर्षीय
शोभितमान थापा मगर र उहाँकी धर्मपत्नी ६० वर्षकै रत्नमाया थापामगर आफ्नै घरमा मृत
अवस्थामा भेटिएका थिए । मगर दम्पतिको शव मतान घरमा स्याउलाले छोपेर राखेको अवस्थामा
मंगलबार विहान भेटिएको थियो । पसलमा सामन खरिद गर्न आएका स्थानीयले मृतअवस्थामा
भेटेर प्रहरीलाई खबर गरेका थिए । स्थानीयबासीका अनुसार मंगलबार विहान लामो समय
सम्म घरको ढोका र पसल नखोलेपछि खोजी गरेका थिए । पटक–पटक मोबाईलमा फोन
गर्दापनि फोन नउठेपछि घरमा खोजी गर्न गएका थिए । घरको अगाडी रगतका थोप्लाहरु थिए ।
रगत पैलाउदै जाँदा मतान घरको मुनीपट्टी दुवै जनाको शव एकैठाउँमा राखेर स्याउलाले
छोपेर राखिएको अवस्थामा फेला पारेका थिए ।
घट्नास्थलमा देखिएको रगत र कोदालो भेटिएपछि
घटना हत्या नै भएको हुनसक्ने आशंका प्रहरीले गरेको थियो । घट्ना शंकास्पद देखेपछि
प्रहरीले घटनास्थल सुरक्षीत राखी धरानबाट तालीम प्राप्त कुकुर ल्याएर अनुसन्धान
शुरु गरेको छ । अनुसन्धानलाई थप प्रभावकारी बनाउन तालीम प्राप्तको कुकुरको प्रयोग
पश्चात बुधबार बेलुका मात्र शवपरिक्षणका लागि जिल्ला अस्पताल पठाईएको थियो ।
विहिबार भएको शवपरिक्षण पश्चात मगर दम्पतिको स्थानीय घाटमा एउटै चित्तामा राखेर
दाह संस्कार गरिएको स्थानिय बासीले जानकारी दिएका छन् । घट्नाको विषयमा अनुसन्धान
भईरहेको जिल्ला प्रहरी कार्यालय ओखलढुंगाले जानकारी दिएको छ ।
मगर दम्पतिका १ छोरा र ५ छोरी रहेका छन् ।
सबैजना छोराछोरीको विवाह भईसकेको छ । छोराबुहारी
काठमाण्डौमा बस्ने भएकाले बुढाबुढी मात्रै घरमा बस्दै आएका थिए
।
