१४ वैशाख,
बुटवल । लुम्बिनीमा बहुमतको सरकार
गठनका लागि नेपाली कांग्रेस नेतृत्वको ८ दलीय गठबन्धनले दावी पेश गर्ने भएको छ ।
गठबन्धनले बिहिबार कांग्रेस संसदीय दलका नेता
डिल्लीबहादुर चौधरीलाई नयाँ मुख्यमन्त्रीको रुपमा अघि सार्दै दावी पेश गर्ने भएको
हो ।
गत पुस २७ मा संविधानको धारा १६८ (२) अनुसार
नेकपा एमालेबाट मुख्यमन्त्री बनेका लिला गिरीले वैशाख ११ गते प्रदेश सभामा
विश्वासको मत नपाएपछि नयाँ सरकार गठन हुन लागेको हो ।
केन्द्रमा सत्ता समीकरण बदलिएका कारण
माओवादीसहित ५ दलले समर्थन फिर्ता लिएपछि गिरीले विश्वासको मत गुमाएका थिए ।
त्यसपछि प्रदेश प्रमुख अमिक शेरचनले संविधानको धारा १६८ को उपधारा २ अनुसार नयाँ
सरकार गठनको लागि आज दिउँसो ४ बजेभित्र दावी पेश गर्न समयसीमा दिएका छन् ।
नेपाली कांग्रेसका प्रमुख सचेतक जन्मजय
तिमिल्सिनाले चौधरीलाई मुख्यमन्त्री नियुक्त गर्न ५३ सांसदको हस्ताक्षरसहित दाबी
पेस गर्ने तयारी गरेको बताए ।
८७ सदस्यीय लुम्बिनी प्रदेश सभामा बहुमतका लागि
४४ सांसदको समर्थन चाहिन्छ । लुम्बिनीमा एमालेका २९, नेपाली कांग्रेसका २७, माओवादीका
११, राप्रपा र नागरिक उन्मुक्ति पार्टीका ४÷४
जना, जनमत पार्टी, जनता समाजवादी पार्टी र लोकतान्त्रिक
समाजवादी पार्टीका ३÷३ जना, राष्ट्रिय जनमोर्चा र नेकपा एकीकृत समाजवादीका
एक÷एकजना र स्वतन्त्र एक सांसद रहेका छन् ।
