राजकुमार कार्की
जेठ १४ ।
जिल्लाको दुई स्थानीय तहमा लैंगिक हिंसा रोकथाम तथा प्रतिकार्य समन्वय बैठक
सम्पन्न भएको छ । सुनकोशी गाउँपालिका र चम्पादेवी गाउँपालिकामा लैंगिक हिंसा
सम्बन्धी रोकथाम तथा प्रतिकार्य कार्यक्रम सम्बन्धी समन्वय बैठक सम्पन्न भएको हो ।
जेठ १३ गते सुनकोशी गाउँपालिका र १४ गते चम्पादेवी गाउँपालिकामा कार्यक्रम सम्पन्न
भएको छ । गाउँपालिकाका अध्यक्षको अध्यक्षता तथा जिल्ला समन्वय समिति ओखलढुंगाका
उपप्रमुख तारा कार्कीको प्रमुख आतिथ्यमा भएको बैठकले विभिन्न निर्णय समेत गरेको
युएनएफपीए ओखलढुंगाकी संयोजक रेखा श्रेष्ठले जानकारी दिनुभयो ।
दुवै गाउँपालिकाले
एकद्वार संकट ब्यवस्थापन केन्द्रका घटना व्यवस्थापक र सुरक्षीत आवास गृहको सेवालाई
निरन्तरता दिने निर्णय गरेका छन् । त्यसैगरी सुनकोशी गाउँपालिकाले लैंगिक समानता
तथा सामाजिक समाबेशीकरण नीति तयार गर्ने, लैंगिक हिंसा निवारण कोष सन्चालन सम्बन्धी
कार्यविधी बनाई सन्चालन गर्ने निर्णय गरेको छ । चम्पादेवी गाउँपालिकाले लैंगिक
हिंसामुक्त गाउँपालिका घोषणा गर्ने निर्णय समेत गरेको छ । गाउँपालिकाका अध्यक्ष, उपाध्यक्ष, प्रमुख प्रशासकीय
अधिकृत लगायत शाखा प्रमुखहरुको उपस्थितिमा
समन्वय बैठक सम्पन्न भएको छ ।
लैंगिक हिंसाको
वर्तमान अवस्था, औचित्यको बारेमा युएनएफपीएकी जिल्ला संयोजक रेखा श्रेष्ठले प्रस्तुत गर्नु
भएको थियो । लैंगिक हिंसा सम्बन्धीका कार्यक्रम आफ्नो स्थानीय तहमा आवश्यक रहेको
बताउदै आगामी दिनमा न्युनीकरणका कार्यक्रमहरु गर्न सुनकोशी गाउँपालिकाका अध्यक्ष
कमल तामङ र चम्पादेवी गाउँपालिकाका अध्यक्ष नवराज केसीले प्रतिवद्धता समेत जनाएका
छन् । त्यसै गरी कार्यक्रमका प्रमुख अतिथी जिसस उपप्रमुख कार्कीले लैंगिक हिंसा
सम्बन्धीको कार्यक्रम प्रत्येक स्थानीय तहमा आवश्यक भएकाले लैंगिक हिंसा न्युनीकरण
सम्बन्धी कार्यक्रम सन्चालन गर्न पालिकालाई सुझाव समेत दिनुभएको थियो । परियोजना
लागु नभएका ४ वटा स्थानीय तहमा समन्वय बैठक मार्फत कार्यक्रमको जानकारी गराईएको
सिएमसी नेपाल विराटनगरका स्वास्थ्य संयोजक घनश्याम शर्माले जानकारी दिनुभयो ।
लैंगिक हिँसा रोकथाम
तथा प्रतिकार्य परियोजना दोश्रो चरणको कार्यक्रम सन्चालनमा छ । युएनएफपीएको आर्थीक
सहयोगमा २०१६ बाट पहिलो चरण सुरु भएको थियो भने सन् २०२० बाट दोश्रो चरणको
कार्यक्रम सन्चालनमा रहेको जिल्ला संयोजक रेखा श्रेष्ठले जानकारी दिनुभयो ।
परियोजनाले समुदायमा, विद्यालयमा, परिवार लगायत स्वास्थ्यकर्मीहरुलाई जनचेतनामूलक तालीम, अभिमुखीकरण गोष्ठी, जोडी छलफल गरिरहेको छ
। श्रीमान श्रीमतिहरुको सहभागीतामा जोडी छलफल समेत सन्चालन गरेको छ । युएनएफपीएको
आर्थीक सहयोगमा कोकन नेपालले यो कार्यक्रम सन्चालन गरेको थियो । विवाह गरेको ५
वर्षभित्रका श्रीमान श्रीमतिलाई पटक पटक गरेर ३५ दिन सम्म तालीम, गोष्ठी लगायत छलफलमा
सहभागी गराउने गरेको पनि जानकारी दिएका छन् ।
परियोजना लागूभएको ४ वटा पालिका चिशंखुगढी, मानेभञ्ज्याङ, मोलुङ र सिद्धिचरण नगरपालिकामा युएनएफपीए र पालिकाको आर्थीक साझेदारीमा १÷१ जना पालिकास्तरीय र प्रत्येक वडामा एक–एक जनाका दरले सामुदायिक मनोपरामर्शकर्ता कार्यरत छन । त्यसै गरी जिल्ला स्वास्थ्य कार्यालयमा रहेर एकद्वार संकट व्यवस्थापन केन्द्रमा घट्ना व्यवस्थापक र मनोपरामर्शकर्ता, सुरक्षीत आवास गृहमा मनोपरामर्शकर्ता सहित ३ जना, लैंगिक हिंसा प्रतिकार्यमा कार्यरत छन् । यो परियोजना सन २०२६ सम्म सन्चालनमा रहनेछ । कार्यक्रम स्थानीय समुदायमा प्रभावकारी भएकाले परियोजनाको समाप्ती पछि पनि स्थानीय तहले कार्यक्रम सन्चालन गर्न प्रतिबद्धता जनाएको श्रेष्ठले जानकारी दिनुभयो ।
