राज्य व्यवस्था तथा सुशासन समितिको सभापतिमा रामहरि खतिवडा

झगनखबर

 भदौ ११ । मिनी पार्लीयामेन्टको रुपमा लिइने संसदीय समिति अन्तर्गत राज्यव्यवस्था तथा सुशासन समितिको सभापतिमा ओखलढुंगाका रामहरि खतिवडा निर्विरोध निर्वाचित हुनुभएको छ । सोमबार भएको संसदीय समितिको निर्वाचनमा खतिवडा राज्यव्यवस्था तथा सुशासन समितिको सभापतिमा निर्विरोध निर्वाचित हुनुभएको हो ।  संविधानको धारा ९७ उपधारा १ मा प्रतिनिधी सभा र राष्ट्रिय सभाले संघिय कानुन बमोजिम समितिको गठन गर्न सक्ने ब्यवस्था गरेको छ । संविधानले गरेको व्यवस्थाअनुसार मातहतका १० वटै विषयगत समिति सभापतिको निर्वाचन गरिएको हो ।

राज्य व्यवस्था तथा सुशासन समितिको सभापतिमा निर्वाचित खतिवडा नेपाली कांग्रेसका केन्द्रिय सदस्य तथा ओखलढुंगाबाट निर्वाचित प्रतिनिधी सभा सदस्य हुन् । २०७० सालमा भएको संविधानसभा सदस्यमा ओखलढुंगा क्षेत्र नं.२ बाट निर्वाचित भएका खतिवडा २०७४ सालमा भने पराजीत हुनुभएको थियो । देश संघियतामा गएपछि प्रतिनिधी सभाको एउटा मात्र निर्वाचन क्षेत्र रहेको ओखलढुंगा जिल्लाबाट २०७९ मा निर्वाचित हुनुभएको थियो । जनचासो र जनावश्यक्ताको विषयमा संसदमा  प्रष्ट कुरा उठाईरहने खतिवडा प्रष्ट वक्ताको रुपमा चिनिनुहुन्छ ।

प्रतिनिधी सभाको नियमित काम कारवाहीमा सहयोग पु¥याउन, सरकारलाई प्रतिनिधी सभाप्रति उत्तरदायी र जवाफदेही बनाउने, सरकारबाट भए गरेका कामकारवाहीको नियमित अनुगमन र मूल्याँकन गरी आवश्यक सल्लाह सुझाव र निर्देशन गर्नको लागी प्रतिनिधीसभा नियमावली बमोजिम समितिको गठन गरिएको हुन्छ । राज्य व्यवस्था तथा सुशासन समितिले आफ्नो अधिकार क्षेत्रभित्रका विषयमा कानुन निर्माण गर्नुका साथै सरकारलाई सुशासन, शान्तिसुरक्षा, कानुनी शासनको स्थापना लगायत विभिन्न गतिविधीहरुमा आवश्यक सल्लाह, सुझाव तथा निर्देशन दिने काम गर्दछ ।

प्रतिनिधीसभाको बिहिबार बसेको बैठकले मातहत रहेका १० वटै विषयगत समितिको सभापतिको निर्वाचन  ११ गते सोमबार दिउँसो ३ बजेका लागी तोकीएको थियो । भदौ १० गते भएको मनोनयन दर्ता कार्यक्रमा उक्त समितिको सभापतिमा खतिवडाका मात्र मनोनयन परेको थियो । दलिय सहमती अनुसार नेपाली कांग्रेसको भागमा परेको ४ वटा संसदीय समिति मध्य राज्य व्यवस्था तथा सुशासन समितिको सभापतिमा रामहरि खतिवडाको नाम सिफारिस गरिएको थियो ।