पुस २७ मा सार्वजनिक बिदा दिने सरकारको निर्णय

२५ पुस, काठमाडौं । सरकारले पृथ्वी जयन्तीको दिन २७ पुसमा सार्वजनिक बिदा दिने निर्णय गरेको छ । सोमबार साँझ बसेको मन्त्रिपरिषद बैठकले २७ पुसमा सार्वजनिक बिदा दिने निर्णय गरेको हो । राप्रपाले सरकारलाई समर्थन दिन र सरकारमा सहभागी हुन २७ पुसमा सार्वजनिक विदा दिनुपर्ने अडान  राखेको थियो ।  विश्वासको मत लिई सरकारलाई पुर्णता दिनुपर्ने बाध्यात्मक अवस्थाका कारण राप्रपाको माग स्वीकार गरेको हो ।  सत्ता साझेदार दलहरुको न्यूनतम साझा कार्यक्रममा पनि २७ पुसमा सार्वजनिक विदा दिने उल्लेख थियो । सो न्यूनतम साझा कार्यक्रमलाई सोमबारकै मन्त्रिपरिषद बैठकले पारित गरेको छ । टुक्रा टुक्रा रहेको विभिन्न राज्यलाई पृथ्वीनारायण शाहले एकीकरण गरी नेपाललाई सिङगो राज्य बनाएको इतिहास छ । एकताको प्रतिकका रुपमा पुस २७ गते पृथ्वीजयन्ती मनाउने र सार्वजनिक विदा दिने चलन पहिले देखि थियो । ०६२, ०६३ को  जनआन्दोलन र बृहत शान्तिसम्झौता पश्चात प्रचण्डको मागअनुसार पृथ्वीजयन्ती मनाउन छाडीएको थियो । लगभग १६ वर्ष पछि उनै प्रचण्डले पृथ्वीजयन्तीमा सार्वजनिक बिदा दिने निर्णय गरेका हुन ।