छोराले मासु खाने रहर गर्दा आमाले गरिन् हत्या

राजकुमार कार्की

पुस ९  । बिदाको समयमा आफ्नो घरमा खुशी मनाउन आएको छोरा आफ्नै आमाको हातबाट मर्नुपर्छ भनेर सायदै सोच्न सकिने विषय होइन । तर ओखलढुंगा जिल्लाको खिजीदेम्बा गाउँपालिका–९, पात्लेमा आफ्नै आमाको हातबाट ११ वर्षीय छोरा साङ्गे शेर्पाको ज्यान गएको छ । खिजीदेम्वा–८, स्थित किलखोर्दीङ गुम्बामा लामा अध्ययन गरिरहेका छोरा बिदाको समयमा आमा– बुवासँग खुशी मनाउन घर आएका थिए । स्थानीयबासीका अनुसार, घरमा आएको छोरा साङ्गेले आमासँग भने; ‘आमा मलाई मासु खान मन लागेको छ ल्याई दिनु न’ छोराको मासु खाने रहर सहितको आग्रह आमाले ठाडै अस्वीकार गरिन्, र मासु ल्याउने छाँटकाट देखाईनन् । आमाको यो व्यवहार देखेर छोरा विरक्तीय र घरमा मासु खान नपाएपछि छिमेकीको घरबाट कसैलाई नसोधी मासु ल्याएको निहुँमा छोरालाई झुण्ड्याएर मारेकी थिईन ।

४१ वर्षीय आमा आङपेम्बा शेर्पाले आफ्नै छोरा ११ वर्षीय  साङ्गे शेर्पाको कर्तब्य गरी ज्यान मारेको कसुरमा मंसिर १६ गते प्रहरीले नियन्त्रणमा लिएको थियो । प्रहरीले नियन्त्रणमा लिएर गरिएको अनुसन्धान र शव परिक्षण प्रतिवेदनले बालकको कर्तब्य गरी ज्यान गएको खुलेको थियो । सम्मानित जिल्ला अदालत ओखलढुंगाको पुस ६ गतेको आदेश अनुसार पुर्पक्षको लागि शेर्पालाई कारागार चलान गरिएको छ । प्रहरी अुनसन्धान पश्चात जिल्ला अदालतले पुर्पक्षका लागि कारागार चलान गरेको जिल्ला प्रहरी कार्यालय ओखलढुंगाले जानकारी दिएको छ । 

आफ्नै छोराको हत्या गर्ने आमा को थिइन र कसरी गरिन् हत्या

आङपेम्बा शेर्पा र साविक रगनी गाविस हाल खिजीदेम्बा २ का आङकामी शेर्पा बिचमा आज भन्दा करिब २२ वर्ष पहिले विवाह भएको थियो । विवाह पश्चात उहाँहरुबाट ६ जना बच्चाको जन्म भएको थियो । ६ जना बच्चा मध्ये पहिलाका २ वटी छोरी, १ जनाको करिब २÷३ वर्षको उमेरमा र अर्काको सानैमा मृत्यु भएको थियो । दुईवटी छोरीको मृत्यु भएपछि ४ जना छोराहरु, २१ वर्षीय छप्ते शेर्पा, १८ वर्षीय छिरिङ शेर्पा, १४ वर्षीय फुर्वा शेर्पा र ११ वर्षीय साङ्गे शेर्पा बाँकी रहेका थिए । आजभन्दा लगभग १ वर्षजति अगाडीको समयमा  आङपेम्बा शेर्पाले खिजीदेम्वा गाउँपालिका ९ पात्लेका करिब ७२ वर्षीय गेल्बु शेर्पासँग दोश्रो विवाह गरेकी थिइन् । दोश्रो विवाह गर्दा कान्छो छोरा साङ्गे शेर्पालाई पनि साथमै लिएर आएकी थिइन् । कान्छो छोरालाई खिजीदेम्वा–८, स्थित किलखोर्दीङ गुम्बामा लामा अध्ययन गर्न पठाएका थिए । लामा अध्ययन गर्दै रहेका छोरा आमासँग बिदा मनाउन आमा  भएको ठाउँ खिजीदेम्बा ९ मा आएका थिए । घरमा आएका साङ्गे शेर्पाले आमासँग मासु खान मन लागेको इच्छा ब्यक्त गरेका थिए ।  तर आमाले मासु ल्याउने छाँटकाट नदेखाएपछि नजिकैका छिमेकीको (नाम नखुलेको) बाट जानकारी नदिई मासु झिकेर घरमा लिएर आएका थिए । छिमेकीकोबाट सुचना नदिई (चोरी गरेर) मासु ल्याएको देखेर आमा रिसले चुर हुँदै छोरालाई पिट्न थालीन र अन्तिममा घाँटीमा पासो लगाई मारेर घरको कुलेसोमा राखिन् । र  मेरो छोरा साङ्गे खेल्दाखेल्दै म¥यो भन्दै, रुदै, कराउदै छिमेकी गाउँलेहरुलाई बोलाइन् । उनका श्रीमान गेल्बु शेर्पा भने ससुरालीमा गएका थिए । उनि र उनका छोरा मात्रै घरमा भएको बेला छोराले छिमेकीको घरबाट मासु झिकेर (चोरेर) ल्याएका थिए । छिमेकीको घरबाट मासु चोरेर ल्याएको देखेर छोराको हत्यापश्चात स्थानीय नागरिकलाई छोरा मरेको खबर गरेकी थिईन । स्थानीयबासी जम्मा भएपछि बच्चाको शव देख्दा शंकास्पद देखिएपछि जनप्रतिनिधीलाई खबर गरेका थिए । जनप्रतिनिधी लगायतका स्थानीय नागरिक जम्मा भएपछि, मेरो छोरा खेल्दाखेल्दै मरेको र दाहसंस्कार गर्न छिटो लैजान अनुरोध गर्दै आफन्त मार्फत जनप्रतिनिधीलाई समेत अनुरोध गर्न प्रेशर दिइएकी थिइन् ।  आमाको यस्तो  क्रियाकलाप देखेर स्थानीयबासी र जनप्रतिनिधीले आमामाथी नै शंका गर्ने यथेष्ट प्रमाण भएको दावी गरेका थिए । कुलेसोमा सुताएर राखिएको बच्चाको घाँटीमा प्रष्ट देखिने डोरीको डाम भएको वडा अध्यक्ष ङवाङफुरी शेर्पाले बताउनु भयो । भने नन्द दाटी शेर्पा (पहिलाको श्रीमानको बहिनी) ले समेत बच्चा आफै मरेको नभई कर्तब्य ज्यान भएको हुनसक्ने भन्दै प्रहरीलाई फोनमार्फत जानकारी दिएकी थिइन् ।

पहिलाको घरमा हुँदा सासु आमालाई र जेठो छोरालाई समेत मारेर जेल जान्छु भनेर धम्की दिने गरेको दाटी शेर्पाले जानकारी दिएकी छन्  । (वडा अध्यक्ष ङवाङफुरी शेर्पा र नन्द (पहिलाको श्रीमानको) बहिनी दाटी शेर्पासँगको कुराकानीको आधारमा तयार पारिएको हो ।)