सामुदायिक वन स्थानीय महासंघको प्रथम परिषद सम्पन्न

चैत २९ । सामुदायिक वन स्थानीय महासंघ सिद्धिचरण नगरपालिको प्रथम परिषद सम्पन्न भएको छ । सामुदायिक वनमा भएका विभिन्न समस्याहरुको बारेमा छलफल गर्दै बिहिबार प्रथम परिषद सम्पन्न भएको हो । जिल्ला समन्वय समितिको सभाहलमा भएको कार्यक्रममा  सामुदायिक वनका समस्या र चुनौतिका विषयमा छलफल भएको थियो । सामुदायिक वन स्थानीय महासंघ सिद्धिचरण नगरपालिकाको आयोजना तथा सिद्धिचरण नगरपालिकाको सहकार्यमा परिषद सम्पन्न भएको आयोजकले जानकारी दिएको छ ।

सामुदायिक वन स्थानीय महासंघ सिद्धिचरण नगरपालिकाका अध्यक्ष देवकुमार दाहालको अध्यक्षतामा भएको कार्यक्रममा सिद्धिचरण नगर उपप्रमुख केदारबाबु बस्नेतको प्रमुख आतिथ्यमा कार्यक्रम सम्पन्न भएको थियो । नगरभरीका सामुदायिक वनका अध्यक्ष एवं प्रतिनिधीहरुको उपस्थिती रहेको थियो । उपस्थित अधिकाँस वनकर्मीहरुले सामुदायिक वनमा आम्दानी नहुने भएकोले लेखा परिक्षण गरि पान नम्बर नविकरण गर्न नसक्ने अवस्थामा रहेको गुनासो गरेका थिए । सामुदायिक वनका सामग्रीहरु बिक्रीवितरण गर्न पनि राज्यको झन्जटिलो नीति नियमका कारण सामन्य सामुदायिक वनका उपभोक्ताहरुले काम गर्न नसक्ने गुनासो गरेका थिए । सामुदायिक वन जोगाउँदा आम्दानी पनि नभएको र बाँदरका कारण स्थानीयबासीहरुले आफ्ना खेतबारीमा कमाई खेति समेत लगाउन नसक्ने अवस्थामा पुगेको गुनासो गरेका थिए ।