दाजुभाईको घरमा आगलागी हुँदा ९ लाख भन्दा बढीको क्षति

बैशाख ६ । ओखलढुंगाको चम्पादेवी गाउँपालिका वडा नं. १ स्थित डान्सीटारमा घरमा आगलागी हुँदा ९ लाख भन्दा बढीको क्षति भएको छ । बुधबार अपरान्ह ४ बजेको समयमा चमारे मगरको घरको चुल्होबाट शुरु भएको आगोले चमारे मगर सहित भाई खम्ब बहादुर मगरको समेत घर सहित पशुपन्छी जलेको स्थानियले बताएका छन् । चमारे मगरको ढुंगामाटोले बनेको फुसको छानो भएको १ तले घर  र घरभित्र भएका भाँडावर्तन, लत्तकपडा, खाद्यन्न लगायतका सामग्री जलेर नष्ट भएको छ भने घर नजिकै भएको मतान घर समेत जलेर नष्ट हुँदा मतानमा बाँधेका २ वटा र्भैँसी, १ हल गोरु, २ वटा खसी,४ वटा बाख्रा समेत जलेर नष्ट भएको जिल्ला प्रहरी कार्यालय ओखलढुंगाले जानकारी दिएको छ । उक्त घर मतान लगायत पशुचौपाया जल्दा ४ लाख ५० हजार भन्दा बढीको क्षति भएको छ । चमारे मगरको घर नजिकै रहेको भाई खम्ब बहादुरको पनि घर मतान सहित पशुचौपाया जलेर नष्ट हुँदा ४ लाख ५० हजार भन्दा बढीको क्षति भएको पनि प्रहरीले जनाएको छ । भाई खम्ब बहादुरको १ तले फुसको छानो भएको ढुंगामाटोले बनेको घर र घर भित्र भएका खाद्यन्न, लत्ताकपडा, भाँडावर्तन र मतानमा बाँधेर राखेका १ वटा खसी, २ वटा बाख्रा, १ वटा गोरु र ६ वटा सुँगुर समेत जलेर मरेका थिए । उक्त आगलागीबाट पनि ४ लाख ५० हजार भन्दा बढीको क्षति भएको बताएका छन् । दाजुको घरबाट शुरु भएको आगोले दाजु भाईकै घर र  पशुपन्छी जलेर नष्ट हुँदा ९ लाख भन्दा बढीको क्षति भएको छ ।