झगनखबर
चैत १६ । सनातन हिन्दुराष्ट घोषणा महाअभियानको बिशेष बैठकले सनातन हिन्दुराष्ट्र मुलुकको एजेण्डा बन्नु पर्नेमा जोड दिएका छन् । शुक्रबार धुम्बहाराहीस्थित स्मार्ट मलमा आयोजित छलफल कार्यक्रममा बोल्दै मुलुकको समृद्धिका लागि हिन्दु राष्ट्र महाअभियान मुलुककै एजेन्डा बन्नु पर्नेमा जोड दिएका हुन् ।
छलफलमा सहभागी कांग्रेसका अधिकांश नेताहरुले सनातन हिन्दुराष्ट्र कायम राख्नु पर्छ भन्ने अभियानलाई बृहत् बहसका रुपमा लैजानुपर्ने बताएका छन् । महाअभियानका संयोजक नेपाली कांग्रेसका केन्द्रीय सदस्य तथा सांसद शंकर भण्डारीले कांग्रेसको महासमिति बैठकबाट बहसको विषय बनेको बताउनु भयो । प्रधानमन्त्री प्रचण्डले समेत सदनमा यो विषयलाई गम्भीर रुपमा लिनुभएको छ, भण्डारीले भन्नुभयो,–महासमिति बैठकमा लगेको प्रस्तावलाई स्वीकार गरिसकेको अवस्था छ । अरु दलका साथिहरुले समेत कांग्रेसले लिडरोल लिईदियोस भन्ने चाहाना व्यक्त गरेको उहाँको भनाई छ । कांग्रेस पार्टीले यो विषयलाई मुल मुद्दा बनाएर अघि बढ्नुपर्ने सबै क्षत्रबाट सुझाव आएको भन्दै भण्डारीले एक हप्ताभित्रै सभापतिलाई भेटेर अभियानलाई व्यापकता बनाउने बताउनु भयो ।
छलफलमा पूर्व मन्त्री एवं नेपाली कांग्रेस कन्द्रीय सदस्य पुष्पा भुषाले सनातन हिन्दुराष्ट्र कायम राख्नु पर्छ भन्ने अभियानलाई बृहत् बहसका रुपमा लैजानु पर्ने बताउनु भयो । राष्टसँग जोडिएको विषय भएकाले लोकतन्त्रको मूल्य मान्यता बोकेको कांग्रेसले यो मुद्दाको नेतृत्व लिनु पर्ने उहाँको भनाई छ । सनातन हिन्दुराष्ट्रसँग नेपाल राष्ट्र र नेपाली जनतासंग जोडिएकाले पार्टीभित्र खुल्ला बहस सुरु भएको हो, भुसालले भन्नु भयो– केन्द्रीय समितिका ४० प्रतिशतले यो एजेन्डालाई स्वीकार गरिसकेको छ । अभियानलाई सातवटै प्रदेशमा संस्थागत गर्दै बैचारिक ढंगले अघि बढाउनु पर्ने अभियन्ताहरुलाई सुझाव दिनुभयो ।
त्यस्तै केन्द्रीय सदस्य तथा पूर्व मन्त्री देबेन्द्र कडेलले कांग्रेसको केन्द्रीय कार्य समितिमा कडा रुपमा प्रस्तुत हुनुपर्ने भन्दै यो अभियान अन्तरास्ट्रिय रुपमा उठ्नु पर्ने बताउनु भयो । छलफलमा पूर्व मन्त्री समेत रहेकी केन्द्रीय सदस्य उमा रेग्मीले मुलुकको पहिचानको समस्या होला भन्ने त्रास बढेको बताउनु भयो ।
संविधानसभा सदस्य मोक्तार अहमद्ले गणतन्त्रमा छाडापन बढेको जिकीर गर्दै हिन्दुराष्ट्रले कसैको कुभलो नगर्ने बताउनु भयो । हिन्दुराज्यले सबै धर्मको अस्तित्व जोगिने बिश्वास व्यक्त गरे । नेपाल तरुणदलका पूर्व महामन्त्री पुष्प पराजुलीले सनातन हिन्दुराज्य मुलुकको समृद्धिसंग जोडिएकाले यसैको माध्यामबाट नेपाललाई संसारका सनातन धर्महरुको केन्द्र बनाउन सकिने बताए । छलफलमा दर्जन बढी सांसदहरु सहभागी थिए । स्मार्ट मल सुकेधारामा भएको छलफलमा अभियानका पक्षमा हस्ताक्षर गर्ने अधिकांश केन्द्रीय सदस्यहरु सहभागी थिए ।
