राजकुमार कार्की
पुस २१ ।
जिल्ला प्रहरी कार्यालय ओखलढुंगाले श्रृङ्खलाबद्ध हत्यामा संलग्न भएको आरोपमा चार
युवा पक्राउ गरी सार्वजनिक गरेकोछ । गत असोजमा चार्खुमा भएको एकल महिलाको हत्यारोप
र पुसमा भदौरेमा भएको मगर दम्पतिको हत्यारोपमा प्रहरीले पक्राउ गरी आईतबार सार्वजनिक
गरेको हो । प्रहरीले दुवै ठाउँमा हत्यामा संलग्न भएको आरोपमा चिशंखुगढी गाउँपालिका–३, दियालेका २८ वर्षका
मिलन भन्ने संगम राई, सोई गाउँपालिका–४, रातमाटेका ३० वर्षका विनोद राई, रातमाटेकै ३० वर्षका प्रकाश भुजेल र सोइ
गाउँपालिका–८, माम्खाका ३० वर्षका दोर्जे भन्ने आशोक भुजेललाई सार्वजनिक गरेको छ । संगम
राई र विनोद राईलाई पुस १८ गते, प्रकाश भुजेल र अशोक भुजेललाई १९ गते पक्राउ गरिएको
प्रहरीले जानकारी दिएको छ ।
सिद्धिचरण नगरपालिका–४, चार्खु बस्ने अन्दाजी
५२ वर्षीय एकल महिला रत्न कुमारी कटवाल (कार्की) को असोज २६ गते राती करिब १०
बजेको समयमा घरमै हत्या भएको थियो । हतियारधारी समुहले रत्नकुमारीको दाहिनेपट्टीको
कञ्चट तथा कानको छेउमा दाउरा काट्न प्रयोग गर्ने बन्चरो प्रहार गरी विभत्स हत्या
गरिएको थियो । हत्या पश्चात गरगहना र नगद समेत लुटेर फरार भएका थिए । उक्त
हत्याकाण्डको ३ महिना पुग्न नपाउँदै चिशंखुगढी गाउँपालिका–६, भदौरे गैरीगाउँका
पसले मगर दम्पतिको विभत्स हत्या पश्चात लुटपाट समेत गरिएको थियो । पुस १५ गते
बेलुका करिब ८ बजेको समयमा शोभितमान किराना पसल सन्चालन गर्दै आएका अन्दाजी ६०
वर्षका शोभितमान थापा मगर निजको श्रीमति अन्दाजी वर्ष ६० कै रत्न माया थापा मगरको
कोदालो र अन्य हतियार प्रहार गरी हत्या गरिएको थियो । मगर दम्पतिको पनि
दाहिनेपट्टीको कञ्चट तथा कानको भागमा कोदालो र अन्य हतियार प्रहार गरी विभत्स
हत्या गरिएको थियो । हत्यापश्चात मृत दम्पतिलाई नजिकैको गोठ (मतान) मा लगेर स्याउलाले
छोपेर हत्याराहरु फरार भएका थिए । निज दम्पतिको पसल तथा कोठाबाट अन्दाजी नगद १ लाख, सुनको गहना २ तोला र
काँचो सुन समेत गरी ६ तोला सुन लुटपाट गरेको प्रहरीले जानकारी दिएको छ ।
चार्खु घट्नास्थल बाट
बन्चरो १ थान, रत्न कुमारीको लुटिएको सुन गालेर बनाएको ५.८० ग्रामको रिङ १ थान प्रहरीले
बरामद गरेको छ । भदौरे घट्नास्थल शोभितमान किराना पसल बाट लुटिएको १०० को
रिचार्जकार्ड विनोद राईको खल्तिमा फेला परेको छ । त्यसै गरी आरोपीहरुबाट भरुवा
बन्दुक २ नाल, मोबाईल ४ थान बरामद गरी सार्वजनिक गरिएको छ । श्रृङ्खलाबद्ध रुपमा भएको
हत्या र लुटपाट गरी अभियुक्तहरु फरार हुनुले ओखलढुंगेली नागरिकमा त्रास पैदा भएको
थियो । नेपाल प्रहरी केन्द्रीय अनुसन्धान ब्युरो, कोशी प्रदेश प्रहरी र
जिल्ला प्रहरी कार्यालयको संयुक्त प्रयासमा हत्यामा संलग्नहरुको खोजी गरी पक्राउ
गरिएको थियो । अपराधी प्रमाणित पश्चात कर्तब्य ज्यान सजायः परिच्छेद ५ को दफा ४१
को उपदफा (क) बमोजिम क्रुर यातना दिई वा निर्ममता पूर्वक ज्यान मारेकोमा जन्मकैद
हुनेछ ।
डाँका सजायः परिच्छेद
१९ को दफा २४४ को उपदफा (क) बमोजिम ७ वर्षदेखि १४ वर्षसम्म कैद र ७० हजार रुपैया
देखि १ लाख ४० हजार सम्म जरिवाना हुनेछ । हातहतियार खरखजाना सजायः परिच्छेद ६ को
दफा १२९ को उपदफा १ बमोजिम १० वर्ष कैद र १ लाख जरिवाना र परिच्छेद ६ को दफा १३२
को उपदफा १ बमोजिम ५ वर्ष कैद र ५० हजार सम्म जरिवाना हुने कानूनी ब्यवस्था छ ।
