झगनखबर
भदौ १९ । ओखलढुंगा जिल्लाको एकमात्र नगरपालिका
सिद्धिचरण नगरपालिकाले आफ्नो नयाँ भवनबाट सेवा सुचारु गरेको छ । नवनिर्मित
प्रशासनिक भवनको औपचारीक उद्घाटन गरी सेवा वितरण गर्न शुरु गरेको हो । सानो भवनबाट
सेवा दिईरहेको नगरपालिकाले ठुलो भवन सन्चालनमा आएपछी सेवा प्रवाह गर्न सजिलो भएको
छ । पुरानो भवनमा धेरै शाखाहरु एउटै कोठामा राखेर सेवा प्रवाह गरिरहेका थिए भने
अहिले नयाँ भवनमा सरेपछी विषयगत शाखाहरुलाई सेवा प्रवाह गर्न सजिलो भएको छ ।
पुरानो भवनबाट सेवा प्रवाह गर्दा सेवाग्राही
बस्ने ठाँउ पनि थिएन, नयाँ भवनबाट सेवा वितरण गर्न शुरु गरेपछी कर्मचारी र सेवाग्राही दुवैलाई
सजिलो भएको कार्यकारी अधिकृत बलराम लम्सालले बताउनु भयो । नगरपालिकाको लागी यो भवन
मात्र प्रयाप्त नभएको पनि जानकारी दिनुभयो ।
चार तले नवनिर्मित
भवनको प्रत्येक तलामा सेवाग्राही प्रतिक्षा कक्षको ब्यवस्था गरिएको छ । सेवाग्राहि
आउँदा उभिरहनु पर्दैन प्रतिक्षालय कक्षमा बस्ने ब्यवस्था गरिएको छ । ठुला कोठा
भएपछी अन्य शाखाहरुलाई पनि सेवा प्रवाह गर्न सजिलो भएको छ । उक्त भवन प्रयाप्त
नभएपछी केहि विषयगत शाखाहरुले पुरानै भवनबाट सेवा प्रवाह गरिरहेका छन् ।
२०७८ साल असोज महिना देखि शुरु भएको भवन निर्माण कार्य तोकिएकै समयमा निर्माण सम्पन्न भएको थियो । दुइ करोड ५८ लाख ८ हजार ९४८.१९ लागतमा सम्झौता भएको उक्त भवन जगदम्बा काली जे.भी. काठमाण्डौले निर्माण गरेको हो । आयोजना २०७८ साल असोज १ गते शुरु गरि २०७९ साल माघ ३ गते सम्पन्न गरिनुपर्ने तोकिएको थियो । निर्माण कम्पनीले करिब तोकेकै मितिमा निर्माण सम्पन्न गरेको थियो ।
नयाँ भवनबाट सेवा
प्रवाह गर्न शुरु गरेपछी सेवा प्रवाहमा थप प्रभावकारी हुने र नागरिकले छिटो छरितो
रुपमा सेवा लिन सक्ने भएको नगरप्रमुख तेजन खनाल (तेजेन्द्र) ले बताउनुभयो । नयाँ
भवनमा प्रविधीको प्रयोग गर्न र कर्मचारीहरु लगायत सेवाग्राहीको विचमा सन्चार गर्न
सजिलो भएको बताएका छन् ।
भदौ १७ गते नेपाल
सरकारका परराष्ट्रमन्त्री नारायण प्रसाद (एनपी) साउदले औपचारीक उद्घाटन गर्नु भएको
थियो । उद्घाटन कार्यक्रममा राज्य ब्यवस्था तथा सुशासन समितिका सभापति एवं
प्रतिनिधी सभा सदस्य रामहरि खतिवडा कोशी प्रदेशका खानेपानी सिँन्चाई तथा उर्जा
मन्त्री प्रदिपकुमार सुनुवारको उपस्थितिमा उद्घाटन गरिएको थियो । कार्यक्रमलाई
सम्बोधन गर्दै प्रमुख अतिथी मन्त्री साउदले प्रशासनिक नीतिगत कुराहरुलाई सुधार
गर्दै लैजाने र ओखलढुंगाको थप विकास गर्न पर्यटन प्रबद्र्धनका लागी आवश्यक सहयोग
गर्ने प्रतिबद्धता जनाउनु भयो ।
प्रशासनिक भवन
अपाँगमैत्री र ज्येष्ठनागरिक मैत्री नभएको स्थानियबासीको गुनासो रहेको छ । ४ तले
भवनमा लिफ्टको ब्यवस्था नभएपछी अपाँगता भएका ब्यक्ति र बृद्ध–बृद्धाहरुलाई सिँढी
चढेर माथील्लो तलामा गएर सेवा लिन समस्या हुने बताएका छन् । भवनमा लिफ्टको स्टिमेट
डिजाइन नभएकाले अपाँगमैत्री र ज्येष्ठ नागरिकमैत्री भवन निर्माण गर्नबाट चुकिएको
कार्यकारी अधिकृत लम्सालले बताउनु भयो ।
