गण्डकी प्रदेशका मुख्यमन्त्री अधिकारी पदमुक्त

वैशाख ९,  । गण्डकी प्रदेशका मुख्यमन्त्री खगराज अधिकारी पदमुक्त हुनुभएको छ । गण्डकी प्रदेशसभामा ६० मत मध्य अधिकारीको पक्षमा २४ मत खसेको थियो । विश्वासको मत प्राप्त गर्न कम्तीमा ३१ सांसदको समर्थन आवश्यक पर्दछ । अधिकारीको पक्षमा एमाले र राप्रपाका सांसदको  २४ मत खसेको  थियो । नेकपा एमाले, नेकपा माओवादी केन्द्र र राप्रपाका सांसदको समर्थनमा २५ पुसमा मुख्यमन्त्री बन्नुभएका  अधिकारी करिब साढे ३ महिना पदमा रहनुभयो ।

मुख्यमन्त्री अधिकारीको विश्वासको मतको विपक्षमा ३५ मत खसेको छ । नेपाली कांग्रेसका २७, माओवादी केन्द्रका ७ र हालै नेकपा एकीकृत प्रवेश गरेका राजीव गुरुङको १ मत गरि जम्मा  ३५ मत खसेको हो । सत्ता साझेदार  नेकपा माओवादी केन्द्रले चैतको १० गते अधिकारीलाई दिएको समर्थन फिर्ता लिँदै सरकारबाट बाहिरिएको थियो । माओवादी केन्द्रले समर्थन फिर्ता लिएपछि मुख्यमन्त्री अधिकारीले प्रदेशसभामा विश्वासको मत लिनुपर्ने संवैधानिक बाध्यता उत्पन्न भएको थियो ।