करार सेवाका शिक्षक कर्मचारीको सम्झौता रद्द गर्ने सिद्धिचरणको निर्णय

राजकुमार कार्की

 असोज ३१ । सिद्धिचरण नगरपालिकाले स्वीकृत दरबन्दीभित्र नरहेका शिक्षक कर्मचारीको सम्झौता रद्द गर्ने निर्णय गरेको छ । बिहिबार बसेको नगरकार्यपालिकाको बैठकले स्वीकृत दरबन्दी बाहेकका शिक्षक कर्मचारीहरुको  सम्झौता रद्द गर्ने निर्णय गरेको हो । स्वीकृत दरबन्दी बाहेकका कर्मचारीको सम्झौता रद्द गर्न संघिय मामिला तथा सामान्य प्रशासन मन्त्रालय र अर्थ मन्त्रालयले गरेको परिपत्रानुसार सम्झौता रद्द गरिएको नगरप्रमुख तेजन खनालले जानकारी दिनुभयो ।

असोज ५ गते बसेको  नेपाल सरकार मन्त्रीपरिषदको बैठकमा नेपाल सरकार, प्रदेश तथा स्थानीय तहमा स्वीकृत दरबन्दी बाहेकका अस्थाई तथा करारमा कर्मचारी राख्न नपाउने निर्णय गरेको थियो । सोइ निर्णय कार्यान्वयन गर्न संघिय मामिला तथा सामान्य प्रशासन मन्त्रालयले असोज ८ गते  च.नं ११३ को पत्र र अर्थ मन्त्रालयले असोज ७ गते च.न. ११८ को पत्र पठाएका थिए । नेपाल सरकारले गरेको निर्णय अनुसार नगरपालिकाको श्रोतबाट तलब भत्ता भुक्तानी हुने निजी श्रोत शिक्षक  कर्मचारीको कातिक १ गतेबाट लागु हुने गरि सम्झौता रद्द गरिएको प्रमुख प्रशासकीय अधिकृत किसान न्यौपानेले जानकारी दिनुभयो ।

कार्यालय सहयोगी, सडक हेरालु, सरसफाई कर्मी, कृषीअधिकृत, एकगाउँ एक प्राविधक अन्तर्गत कृषी र पशुप्राविधिक सहित १८ जनाको सम्झौता रद्द गरिएको छ । त्यसै गरि विकास साझेदार संस्था सँग साझेदारीमा तलब भत्ता दिने गरि सम्झौता भएका कर्मचारीहरुको नगरले दिने तलब भत्ता समेत कटौती गरेको नगरपालिकाले जनाएको छ । विकास साझेदार सँग सम्झौता भई ९ जना सामुदायिक मनोसामाजिक कार्यकर्ता कार्यरत थिए । प्रदेश सरकार, नगरपालिका र  करुणा फाउनडेशनको साझेदारीमा  अपाङ्गता रोकथाम तथा पुनःस्थापना कार्यक्रम तर्फका ३ जना कर्मचारी कार्यरत रहेका थिए । विकास साझेदार संस्थासँगको साझेदारीमा १२ जना कर्मचारी कार्यरत रहेका छन् । साझेदार संस्थाले उपलब्ध गराएको कम तलब भत्तामा काम गर्न इच्छुक कर्मचारीले भने काम गर्न पाउनेछन् । नगरपालिकाको तर्फबाट उपलब्ध गराउने तलबभत्तामात्र कटौती गरिएको हो ।

 विभिन्न विद्यालयहरुमा दरबन्दी बाहेकका हटाइएका शिक्षकहरुको यकिन तथ्यांक भने आउन सकेको छैन । नगरपालिकाबाट वडामा बजेट जानेभएकाले कुन–कुन विद्यालयमा कति जना शिक्षक करारमा नियुक्ती गरेका छन्, जानकारी नआएको शिक्षा शाखा प्रमुख फडिन्द्र कटवालले जानकारी दिनुभयो । नगरपालिका बाट करार दरबन्दीमा शिक्षक नियुक्तीका लागि पठाउने गरेको सबै वडाको बजेट कटौती गर्ने निर्णय गरेको बताएका छन् । सिद्धिचरण नगरपालिका, नेपाल सरकार मन्त्रीपरिषदको बैठकमा नेपाल सरकार, प्रदेश तथा स्थानीय तहमा स्वीकृत दरबन्दी बाहेकका अस्थाई तथा करारमा कर्मचारी राख्न नपाउने निर्णयको कार्यान्वयन गर्ने जिल्लाको पहिलो स्थानीय तह बनेको छ ।